নিউজ ডেস্ক। উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ প্ৰতীক চিহ্ন হিচাপে পৰিগণিত হোৱা বুলডোজাৰক লৈ এতিয়া উত্তৰ প্ৰদেশত চলিছে ব্যাপক চৰ্চা।
বিধানসভা নিৰ্বাচনৰ সময়ত বিশেষ ভূমিকা পালন কৰা বুলডোজাৰৰ যাদুৱে এতিয়া চুই গৈছে সাধাৰণ জনতাকো। যাৰ বাবে প্ৰয়াগৰাজত অনুষ্ঠিত এক সামুহিক বিবাহত নৱ বিবাহিত দম্পত্তিক দিয়া হ’ল বুলডোজাৰ উপহাৰ।
প্ৰয়াগৰাজৰ কাটৰা মহল্লাৰ ৰামৱতীকা গেষ্ট হাউচত অনুষ্ঠিত চৌৰাচিয়া সমাজৰ সামুহিক বিবাহত সোমবাৰে অগ্নিক সাক্ষী কৰি বিবাহ পাশত আৱদ্ধ হয় ৯ হাল দম্পত্তিয়ে।
এই অনুষ্ঠানত নৱ বিবাহিত দম্পত্তিসকলক অন্যান্য ঘৰুৱা সা-সামগ্ৰীৰ লগতে বুলডোজাৰ উপাহৰ দিয়া কাৰ্যই লাভ কৰিছে তীব্ৰ চৰ্চা।
বিবাহ সম্পন্ন কৰি এহাল দম্পত্তিয়ে কয়, এই বুলডোজাৰ আমাৰ ভগ্নী আৰু কন্যাসকলৰ সুৰক্ষাৰ প্ৰতীক। এয়া উত্তৰ প্ৰদেশৰ বিকাশৰ প্ৰতীক। আনহাতে বুলডোজাৰ উপহাৰ লাভ কৰি মুখ্যমন্ত্ৰী যোগী আদিত্যনাথক ধন্যবাদ জনায় দম্পত্তিসকলে।
অনুষ্ঠানত ভাষণ প্ৰদান কৰি প্ৰয়াগৰাজৰ মেয়ৰ অভিলাষ গুপ্তা নন্দীয়ে কয় যে বুলডোজাৰ উত্তৰ প্ৰদেশত সুখ আৰু শান্তিৰ প্ৰতীক।
ইয়াৰ জৰিয়তে, বাৰ্তাটো দিয়া হৈছে যে উত্তৰ প্ৰদেশত য’তেই ভুল কাম হয়, ‘বুলডোজাৰ বাবা’ই তেওঁক এটা পাঠ শিকাব। যোগী চৰকাৰে বুলডোজাৰ চলাই ৰাজ্যখনৰ মাফিয়াসকলক নিৰ্মূল কৰিছে।
যুৱ চৌৰাছিয়া সমাজ সেৱা ট্ৰাষ্টে সোমবাৰে কাটৰাত সামুহিক বিবাহৰ লগতে চৌৰাছিয়া মহাসন্মিলন, ৰক্তদান আৰু চকু পৰীক্ষা শিবিৰ, মেহেন্দি আৰু পেইণ্টিং প্ৰতিযোগিতা আৰু বেবী শ্ব’ৰ আয়োজন কৰে।
এই সময়ছোৱাত, ৯ হাল দম্পত্তিয়ে অগ্নিক সাক্ষী কৰি বিবাহ পাশত আৱদ্ধ হয়। তেওঁলোকক আটাইকে পুতলা বুলডোজাৰ উপহাৰ হিচাপে প্ৰদান কৰা হয়।
অনুষ্ঠানটোৰ মুখ্য অতিথি স্বামী কল্যাণী নন্দ গিৰিয়ে (চোটি চৌৰাছিয়া গুৰু) অনুষ্ঠানটো উদ্বোধন কৰে।
অনুষ্ঠানটোত মেয়ৰ অভিলাষ গুপ্তা নন্দী, বিধায়ক হৰ্ষ বৰ্ধন বাজপেয়ী, নীতেশ চৌৰাছিয়া, অজয় চৌৰাছিয়া, ৰাম প্ৰসাদ চৌৰাছিয়া, মিন্টু চৌৰাছিয়া, উমেশ চৌৰাছিয়া, অনিল চৌৰাছিয়া, বিকাশ কুমাৰ, দিলীপ চৌৰাছিয়া আৰু অন্যান্য সকল উপস্থিত থাকে।
উল্লেখ্য যে, বিগত কাৰ্যকালত মুখ্যমন্ত্ৰী যোগী আদিত্যনাথে উত্তৰ প্ৰদেশৰ মাফিয়া ৰাজ নিৰ্মূলৰ বাবে বিশেষ পদক্ষেপ গ্ৰহণ কৰিছিল।
অনৈতিক কামৰ বিৰুদ্ধে বুলডোজাৰ চলাই চৰ্চা লাভ কৰা মুখ্যমন্ত্ৰীগৰাকীৰ সমৰ্থনত বিধানসভা নিৰ্বাচনৰ সময়তো ৰাজ্যখনৰ বহু জিলাত বুলডোজাৰ শোভাযাত্ৰা বাহিৰ কৰা পৰিলক্ষিত হৈছিল।