নিউজ ডেস্ক। এক আচৰিত ঘটনা। হোমৱৰ্ক নকৰাৰ বাবেই শিক্ষকে আক্ৰমণ কৰিলে এজন সপ্তম শ্ৰেণীৰ ছাত্ৰক।
শিক্ষকৰ প্ৰহাৰত প্ৰাণ গ’ল ১৩ বছৰীয়া ছাত্ৰৰ।
এই ঘটনা বুধবাৰে আবেলি সংঘটিত হয় ৰাজস্থানৰ চুৰু জিলাৰ ছালাচাৰ আৰক্ষী থানা অন্তৰ্গত কোলাচাৰ গাঁৱৰ এখন ব্যক্তিগত বিদ্যালয়ত।
বিদ্যালয় খনৰ নাম মডাৰ্ণ পাব্লিক স্কুল।আৰু শিক্ষকৰ বলি হোৱা ছাত্ৰজনৰ নাম হ’ল গণেশ।
খবৰ অনুসৰি, এই সামান্য অজুহাতৰ বাবেই মনোজ নামৰ শিক্ষকজনে ছাত্ৰজনক মাটিত পেলাই লৈ ইমানেই গুৰিয়াইছিল যে তেওঁৰ নাকৰ পৰা ৰক্তক্ষৰণ আৰম্ভ হৈছিল। যাৰ ফলত লগে লগে শিশুটি মূৰ্ছা গৈছিল।
যেতিয়া ছাত্ৰজনে কিছু সময়ৰ বাবে জ্ঞান ঘূৰাই পোৱা নাছিল, তেতিয়া অভিযুক্ত শিক্ষকজনে তেওঁক চিকিৎসালয়লৈ লৈ গৈছিল। কিন্তু চিকিৎসকে শিশুটিক মৃত বুলি ঘোষণা কৰে।
পৰৱৰ্তী সময়ত অভিযুক্ত শিক্ষকজনক শিশুটিৰ পিতৃ ওমপ্ৰকাশৰ অভিযোগত আৰক্ষীয়ে গ্ৰেপ্তাৰ কৰে।
ৰাজ্যখনৰ শিক্ষা মন্ত্ৰীয়ে তদন্ত সম্পূৰ্ণ নোহোৱালৈকে বিদ্যালয়খনক স্বীকৃতি মুক্ত কৰিবলৈ নিৰ্দেশ দিয়ে। শিশুটিৰ মৰণোত্তৰ পৰীক্ষা কৰি এখন প্ৰতিবেদন দাখিল কৰা হয়।
শিশুটিৰ পিতৃয়ে জনোৱা অনুসৰি, শিশুটিৰ মূৰ, চকু আৰু মুখত আঘাতৰ চিহ্ন আছিল।
শিশুটিয়ে ১৫ দিন আগতেই শিক্ষকজনৰ বিষয়ে পিতৃক অভিযোগ কৰিছিল। শিশুটিয়ে কৈছিল যে শিক্ষক মনোজে তেওঁক অপ্ৰয়োজনীয়ভাৱে প্ৰহাৰ কৰে।
ছালাছাৰৰ আৰক্ষী বিষয়া সন্দীপ বিষ্ণোই কয় যে, কোলাচাৰ গাঁৱৰ ১৩ বছৰীয়া গণেশে এখন ব্যক্তিগত বিদ্যালয়ত পঢ়ি আছিল। শিশুটি বুধবাৰে পুৱা বিদ্যালয়লৈ গৈছিল। য’ত শিক্ষক মনোজে হোমৱৰ্ক নকৰাৰ বাবে তেওঁক প্ৰহাৰ কৰিছিল। যাৰ ফলত তেওঁ প্ৰাণ হেৰুৱাইছিল। পিতৃয়ে শিক্ষকজনৰ বিৰুদ্ধে হত্যাৰ এটা গোচৰ ৰুজু কৰে।
বিদ্যালয়খন অভিযুক্ত শিক্ষকজনৰ পিতৃ বনৱাৰী লালৰ। শিশুটিয়ে মডাৰ্ণ পাব্লিক স্কুলত সপ্তম শ্ৰেণীত পঢ়ি আছিল।
শিক্ষকজনে আৰক্ষীক কয় যে, গণেশে হোমৱৰ্ক কৰা নাছিল। যেতিয়া তেওঁক মাৰপিট কৰা হৈছিল, তেতিয়া তেওঁ মূৰ্ছা গৈছিল। তেওঁ শিশুটিক চিকিৎসালয়লৈ লৈ গৈছিল। শিশুটিৰ পিতৃয়ো চিকিৎসালয়লৈ গৈছিল। কিন্তু চিকিৎসকে শিশুটিক মৃত বুলি ঘোষণা কৰে।
উল্লেখ্য যে শিশুটি অচেতন হোৱাৰ পিছত শিক্ষকজনে তেওঁৰ পিতৃক মাতিছিল আৰু শিশুটিয়ে অচেতন হোৱাৰ ভাও ধৰি আছে বুলি কৈ পিতৃক ঘৰলৈ লৈ যাবলৈ কৈছিল। অভিযুক্ত শিক্ষকজনে পিছত ছাত্ৰজনৰ স্বাস্থ্যৰ অৱনতি হোৱা দেখাত তেওঁক চিকিৎসালয়লৈ লৈ গৈছিল।
বৰ্তমান শিক্ষা বিভাগৰ এটা দলে বিদ্যালয়খনলৈ যায় আৰু শিক্ষকসকলৰ ৰেকৰ্ড সংগ্ৰহ কৰে।