নিউজ ডেস্ক। মঙ্গলবাৰে সংসদত ২০২২-২৩ বিত্তীয় বৰ্ষৰ বাজেট দাখিল কৰিছে বিত্তমন্ত্ৰী নিৰ্মলা সীতাৰমনে। এই বাজেটে উত্তৰ-পূৰ্বাঞ্চললৈ কেইবাটাও আশাৰ বতৰা কঢ়িয়াই আনিছে।
এইবাৰ বাজেটত উত্তৰ-পূৰ্বাঞ্চলৰ সামগ্ৰিক বিকাশৰ বাবে ১৫০০ কোটি টকা আৱণ্টন দিয়া হৈছে। এই বাজেটত উত্তৰ-পূৰ্বাঞ্চলৰ উন্নয়নৰ পৰিকল্পনা আৰম্ভ কৰা হ’ব বুলি ঘোষণা কৰি এই পৰিকল্পনাৰ জৰিয়তে ইয়াৰ জনসাধাৰণৰ জীৱনৰ মানদণ্ড উন্নত কৰি তোলা হ’ব কোৱা হৈছে।
তদুপৰি, উত্তৰ-পূবৰ সকলোবোৰ আঁচনিতে ৰাজ সাহায্য লাভ কৰিব বুলিও বাজেটত ঘোষণা কৰে বিত্তমন্ত্ৰী সীতাৰমনে।
আনহাতে চৰকাৰে কৰ্পোৰেট কৰ ১৮ শতাংশৰ পৰা ১৫ শতাংশলৈ হ্ৰাস কৰাৰ ঘোষণা কৰিছে। সমান্তৰালভাৱে দিব্যাংগসকলৰ বাবেও কৰ ৰেহাই ঘোষণা কৰা হৈছে।
ৰাজ্য চৰকাৰৰ কৰ্মচাৰীসকলক তেওঁলোকৰ সামাজিক সুৰক্ষাৰ প্ৰতি লক্ষ্য ৰাখি কেন্দ্ৰীয় চৰকাৰৰ কৰ্মচাৰীৰ সমহাৰত কৰ কৰ্তনৰ সীমা ১০ শতাংশৰ পৰা ১৪ শতাংশ লৈ বৃদ্ধি কৰা হ’ব।
ৰাজ্যসমূহক সহায় কৰিবলৈ ১ লাখ কোটি টকা দিয়াৰ কথা ঘোষণা কৰি বিত্তমন্ত্ৰীয়ে ই ৰাজ্যসমূহক ৫০ বছৰৰ বাবে সুতমুক্ত ঋণ প্ৰদান কৰিব বুলি ঘোষণা কৰে।
ইফালে চলিত বিত্তীয় বৰ্ষৰ পৰা দেশত ডিজিটেল মুদ্ৰা আৰম্ভ কৰাৰ কথা ঘোষণা কৰে বিত্তমন্ত্ৰী নিৰ্মলা সীতাৰমনে।
বাজেটত সৌৰ শক্তি উৎপাদনৰ বাবে আৱণ্টন ১৯,৫০০ কোটি টকা বৃদ্ধি কৰা হৈছে আৰু দেশত বৈদ্যুতিক বাহনৰ বাবে নতুন চাৰ্জিং ষ্টেশ্যন স্থাপনৰ কথা কোৱা হৈছে।
বিত্তমন্ত্ৰীয়ে ৫জি মুকলি কৰাৰ বাবে আঁচনি গ্ৰহণ কৰা হ’ব বুলিও ঘোষণা কৰে। দেশৰ সকলো লোকে ইণ্টাৰনেট ব্যৱহাৰ কৰিব পৰাকৈ এই আঁচনি গ্ৰহণ কৰা হব।
এতিয়াৰে পৰা ডাকঘৰতো অনলাইন ট্ৰাঞ্চফাৰ কৰিব পৰা যাব। ডাকঘৰবোৰ মূল বেংকিং সেৱাৰ অধীনলৈ আহিব। দেশৰ ৭৫ খন জিলাত ডিজিটেল বেংকিং আৰম্ভ কৰা হ’ব। ডাকঘৰসমূহতো এটিএমৰ সুবিধা থাকিব।
আনহাতে, নাগৰিকসকলৰ বাবে সুবিধা বৃদ্ধি কৰিবলৈ ২০২২-২৩ বৰ্ষৰ পৰা ই-পাছপোৰ্ট জাৰি কৰা হ’ব।
বিত্তমন্ত্ৰীয়ে ঘোষণা কৰে যে ২০২২-২৩ বৰ্ষত প্ৰধানমন্ত্ৰী আৱাস যোজনাৰ অধীনত ৮০ লাখ ঘৰ নিৰ্মাণ কৰা হ’ব। ইয়াৰ বাবে ৪৮,০০০ কোটি টকাৰ পুঁজি ধাৰ্য কৰা হৈছে।
বাজেটত ডিজিটেল বিশ্ববিদ্যালয় স্থাপন কৰাৰ কথা কোৱা হৈছে। সেইদৰে, মানসিক সমস্যাৰ বাবে ৰাষ্ট্ৰীয় টেলিমেণ্টেল স্বাস্থ্য কাৰ্যসূচী আৰম্ভ কৰাৰ কথাও কোৱা হৈছে।
ৰাজ্য চৰকাৰসমূহক তেওঁলোকৰ পাঠ্যক্ৰমত ফাৰ্মিং পাঠ্যক্ৰম অন্তৰ্ভুক্ত কৰিবলৈ উৎসাহিত কৰা হ’ব বুলি ঘোষণা কৰে বিত্তমন্ত্ৰীয়ে।
ইপিনে, বাজেটত ২০২২-২৩ চনৰ ভিতৰত ৰাষ্ট্ৰীয় ঘাইপথৰ দৈৰ্ঘ্য ২৫,০০০ কিলোমিটাৰলৈ বৃদ্ধি কৰা হ’ব বুলি ঘোষণা কৰা হৈছে।
এইবাৰ বাজেটত ইলেক্ট্ৰনিকছৰ ওপৰত কৰ ৰেহাই দিয়াৰ কথা ঘোষণা কৰা হৈছে। একে সময়তে, ৰত্ন আৰু গহনাবোৰৰ ওপৰত কাষ্টম শুল্ক ৫ শতাংশলৈ হ্ৰাস কৰা হৈছে। নকল গহনাৰ ওপৰত কাষ্টম শুল্ক প্ৰতি কিলোগ্ৰামত ৪০০ টকা হ’ব।
আনহাতে, এই বিত্তীয় বৰ্ষত ডিজিটেল মুদ্ৰা মুকলি কৰা হ’ব বুলি কোৱা হৈছে। তদুপৰি, ডিজিটেল মুদ্ৰাৰ(ক্ৰিপ্টোকাৰেন্সি) পৰা উপাৰ্জনৰ ওপৰত ৩০ শতাংশ কৰ আৰোপ কৰা হৈছে।
লগতে চাওকঃ
