নিউজ ডেস্ক। দেশত পেট্ৰ’ল আৰু ডিজেলৰ মূল্য ক্ৰমান্বয়ে বৃদ্ধি পাই আছে। ইন্ধনৰ মূল্যবৃদ্ধিয়ে এতিয়া ৰাজনৈতিক বাক্যবাণ তীব্ৰ কৰি তুলিছে।
ইন্ধনৰ মূল্যবৃদ্ধি সন্দৰ্ভত আচৰ্য্যকৰ মন্তব্য কৰি আহিছে বিজেপি নেতা-মন্ত্ৰীয়ে।
শেহতীয়াকৈ বিজেপি নেতা ভবেশ কলিতাই মূল্যবৃদ্ধি সন্দৰ্ভত এক বিতৰ্কিত মন্তব্য কৰিছিল। তেওঁ কয় যে, যদি পেট্ৰ’ল প্ৰতি লিটাৰত ২০০ টকা হয়, তেন্তে বাইকত তিনিজন উঠাৰ ক্ষেত্ৰত ৰেহাই দিয়া হ’ব।
ইয়াৰ পিছতেই তেওঁ তেওঁৰ বক্তব্যৰ বাবে সৰ্বত্ৰে সমালোচনাৰ সন্মুখীন হৈছে।
এইবাৰ তেওঁক সেই মন্তব্যৰ বাবে সমালোচনা কৰিছে প্ৰসিদ্ধ কবি কুমাৰ বিশ্বাসে। বিশ্বাসে শেহতীয়াকৈ তেওঁক এটা প্ৰশ্ন কৰি টুইট কৰিছে।
কুমাৰ বিশ্বাসে বিজেপি নেতা ভবেশ কলিতাৰ বক্তব্যক সমালোচনা কৰি সুধিছিল, “গতিকে, যদি পেট্ৰ’ল প্ৰতি লিটাৰত ৪০০ টকালৈ বৃদ্ধি পায়, তেন্তে দেশবাসীয়ে স্কুটাৰ আৰু মটৰচাইকেলৰ ওপৰত এখন ছাদ ৰাখিব পাৰিবনে?”
तो फिर पैट्रोल 400 लीटर रुपए हो जाने पर स्कूटर-मोटरसाइकिल पर छत डाल सकेंगे देशवासी ? ❤️👏👏🇮🇳🙏 जयहिंद 💪🏼https://t.co/XJyiNkjyBm
— Dr Kumar Vishvas (@DrKumarVishwas) October 22, 2021
ছ’চিয়েল মিডিয়া ব্যৱহাৰকাৰীসকলে এতিয়া বিখ্যাত কবি কুমাৰ বিশ্বাসৰ টুইটত ভিন্ন মন্তব্য কৰিছে।
শিখা মিশ্ৰ নামৰ এগৰাকী ব্যৱহাৰকাৰীয়ে কুমাৰ বিশ্বাসৰ টুইটত সমালোচনা কৰি লিখিছিল, “আৰু ঘৰত এযোৰ গঁড় কিনিবলৈ ৰাজসাহায্যও দিয়া হ’ব।”
স্বামী নামৰ এজন ব্যৱহাৰকাৰীয়ে লিখিছিল, “এনে যুক্তি থকা নেতাসকল কেৱল ভাৰতত কিয় জন্মগ্ৰহণ কৰে? হে ভগৱান, কিবা এটা কৰা। লাগিলে আমাক প্ৰস্তৰ যুগলৈ লৈ যোৱা, কিন্তু এনে নেতাসকলৰ বাক্যবাণ বন্ধ কৰা।”
কুমাৰ বিশ্বাসৰ টুইটৰ উত্তৰ দি মাৰোৱাৰী নামৰ এজন ব্যৱহাৰকাৰীয়ে কয়, “৫০ শতাংশ ৰাজনীতিবিদে কেৱল প্ৰৱঞ্চনাৰেহে ৰাজনীতিত প্ৰৱেশ কৰিব পাৰে। সেইকাৰণে এনে ধৰণৰ মন্তব্য আহে।
উল্লেখ্য যে, বিজেপি নেতা ভবেশ কলিতাই মন্তব্য কৰি কৈছিল, “আমি দুচকীয়া বাহনত তিনিজন উঠিব লাগিব। আমি তিনি আসনৰ বাইক নিৰ্মাণৰ অনুমতি লম। কিন্তু এইটো তেতিয়া হ’ব, যেতিয়া পেট্ৰ’লৰ মূল্য প্ৰতি লিটাৰত ২০০ টকা হ’ব। এতিয়া তেনে নহয়।”